[遊戲專欄]感作感做：談遊戲廣告學

先旨聲明，雖然CB都係做廣告，不過都只係Online多，但無論Online同Offline廣告做法有一定認識，當然就梗係要留意啦！今次講Ubisoft的《For Honor 榮耀戰魂》，就從廣告角度出發！

《For Honor》近來風頭甚勁，隨處也見廣告

Awareness

唔再想當年，而家遊戲市場咁多選擇，所謂死忠其實隨時代轉變都只有少、不會多。除咗著名系列，就算係大廠出新Game，無Awareness，即係無人注意，咁你隻Game多多好處都未必有好多人知。

Awareness唔係Exposure咁簡單，仲要令人停留得耐同有印象，最勁梗係當諗起你，就諗起你想落廣告嘅野。好似《For Honor》廣告咁，搵達哥拍片已經吸咗一班人，亦做到Viral，即類似網上流行效果。有「筆直」廣告推得勁，嗰期見到達哥就知佢著甲，見佢著甲就知道講咩Game。

至於廣告Billboard，有「筆直」唔怕Mass喎，如果要夠Awareness，Awareness以至Ubisoft唔少遊戲，包括剛剛推出嘅《Ghost Recon Wildlands》，以搶香港市場嚟講Awareness已經做得唔錯。仲靠口碑同Review？香港人無咁笨去信晒（網上太多假資訊同「做媒」），同時亦都會有人笨到唔會理（網上資訊咁多，就算睇完一篇真嘅好評，下一秒都唔記得）。

講Awareness，最重要係吸睛！

Engagement/Action

啲人得個知字無用嘛，返唔到數都唔掂？咩數？好似facebook落AD，同Page、KOL合作都要回本，此其一。呢個回水難啲，但見到Like數咁勁，有關部門咪有數，下次繼續有咁上下「筆直」囉。

第二條數，當然係賣遊戲嘅銷售數，呢樣野廣告幫到手嗎？梗係得。睇下《For Honor》嘅Closed同Open Beta就知。呢樣要同上面Awareness夾，當你見大家對你有印象時，如果都一路淨谷Awareness，無論On定Offline都好快出現審美疲勞，喺適當時候畀少少甜頭，個個抱住真係試嘅心態也好，定人試我試心態亦好（呢樣好講Consumer Behaviour），起碼衝咗先，呢樣就係吸Action，吸到Pre-Order就仲靚仔。

調番轉講，如果齋搞Action，而唔搞Awareness會點？咪WFC囉！咁搞完Closed Beta唔理「正皮」定「負皮」多，無得玩果批人一定想試，好似U廠咁揀啱時候整個Open Beta，就繼續炒熱佢，今次Open Beta仲係遊戲發售嘅前幾日出，玩得興起就搏到Impulsive Buying，即科水買Game！

講Online Engagement，呢種Post最快返到數！

當然，揀好時機畀人試完就可以進一步吸引人購買

Loyalty

Sorry，呢樣廣告幫你唔到。

顧名意義，Loyalty以遊戲界嘅睇法，就係培養死忠加上留住死忠。記住，啲人唔係羊，唔係拍片叫你做死忠就真係做，講到底都要遊質素夠高。難聽啲講句，如果想搵快錢，好似PSY咁做One-Hit Wonder，做好頭兩個就得。如果為公司、甚至遊戲界可以持續發展，唔係搵多多明星拍片就夠。

喺而家資訊咁流通，選擇咁多（娛樂選擇）嘅世界，已經好難培養品牌或者系列死忠，講到尾就係質素。好似遊戲耐玩度－－玩幾次就悶；連線遊戲好重視嘅Server穩定性－－如果每隻遊戲嘅Server都唔穩定，下次再出其他有網上元素嘅遊戲仲有冇人玩？最重要嘅係，而家班消費者識得睇廠商有冇心出，如果係為長期發展，甚至向更高層次如電競方面發展，有時有啲瑕疵都可以接受，而且更易吸引相關機迷；相反，如果只係諗住為賺錢而亂咁推當時潮流興嘅遊戲嚟搵快錢，咁恭喜晒，Loyalty好難建立，亦好易流失。

呢張相講出Loyalty嘅重點係咩，係遊戲本身

想留住真心Fans，質素係最重要嘅一環！

返轉頭講廣告嘅目的。唔同目的有唔同策略，但對唔住，無包生仔的。所以，如果有空間、有「筆直」，不如放手一搏；但當然不能忘記初衷，因為Like數唔代表一切。

延伸閱讀：[玩樂深評]《For Honor》成班麻甩群揪好緊要！


文：CB@unPLUG
unPLUG Page: https://www.facebook.com/unpluggameshk/
Personal Page 我想打機 又要打字: https://www.facebook.com/playgamesandtype/