[玩樂深評]《For Honor》成班麻甩群揪好緊要！

《For Honor 榮耀戰魂》經過兩次Beta後，現在終於推出了！CB玩過Open Beta同正式版，都有幾句說話要講！

在《For Honor》中，男子漢打到九彩是平常不過的事

揪，全部都係揪

《For Honor》入面有好多個模式，有爭據點、有隻揪、有群揪。但講真，大家心目中就只有狂揪，事關玩咩霸地盤，話就話有啲位你唔洗郁無人理都得，但你會覺得好空虛好唔威，好唔夠雷唔夠撐，你都係想出去幫手揪人。當然，以上情況未必成日發生，因為你犯人，人人犯你，你唔砌低人，點贏？同埋當你唔係同朋友玩，同隊無咩偈傾無咩戰術，咁梗係同其他人死過先爽啦！

男仔鍾意無束縛？未必，如果套甲型，一定著上身

撻著戰鬥魂

雖然我能夠唔代表晒所有男性，但我都夠膽講，過半數男仔都有一種戰士魂，尤其是見到啲裝甲同動作。呢隻Game都叫做成功製造到共鳴嘅，好似我咁，就即係用死騎士，因為……我係鍾意騎士嘛，由細到大，好似《Dragon Age》咁我都係Pro Knight嘛，夠硬派囉。我有朋友就鍾意日本武士。如果大家有緣見到我另一位朋友，就知佢會揀維京，因為佢本人留緊維京鬚。道不同，但都好開心，嗰一刻，你嘅角色就係身份認同，唔洗咩國民教育。

呢隻Game就係講揪……最緊要夠英雄主義

耐唔耐玩？

講真，長遠睇我幾擔心隻遊戲嘅耐玩性。首先，我覺得幾依賴同朋友打，因為可以傾下戰術，咁就算玩法同地圖差唔多，都會多啲樂趣。如果同街外人玩，好彩就同隊都肯講下策略，但好大機會出現嘅都係「小朋友齊打交」－－X打。咁就可能十個趣連一半都無。

故事模式？有少少WFC。點解唔係完全WFC？因為網上有位靚女名人打緊囉

加地圖？玩多幾場差唔多熟；加多啲模式？如果最後都係X打，其實無意思。叫大家記招研究點玩？唔係個個咁有耐性。點樣增加耐玩性，係一個挑戰，當然前提係廠商真係想大家玩落去……

咦？好似講少咗啲野？單機模式呢？Sorry，我諗都幾WFC。唔關隻Game事嘅，咁大家都係想揪人啫，減下壓，咪唔洗好似某執法部門咁要幾萬人上街講粗口囉……

 多人遊戲有呢啲模式，但簡單一句：揪贏咪得囉

文：CB

遊戲名稱：《For Honor》
對應平台：PS4、Xbox One、Windows（測試版本為PS4）
發行商：Ubisoft
發售日：2017年2月14日（全球同步）
鳴謝：Ubisoft Hongkong提供協助