[玩樂深評]多謝《NieR》，滿足大家

由PlatinumGames操刀、Square Enix發行嘅《NieR:Automata》（《尼爾：自動人形》，以下簡稱《Nier》），由日文版到繁體中文版推出至今，唔知大家經已玩到幾多周目？淨係計結局已經有26個（A-Z），而遊戲首三周目係唔會重複。結局同故事CB喺呢度就唔多講，想講嘅就係《NieR》呢隻遊戲，喺而家呢個鍾意速食遊戲文化嘅時代，成功令玩家可以喺佢身上花心機及停留更多時間，實在係好難得。

 打緊嗰陣要腦補下Cosplayer個樣~

有邊個人唔想Why not both？貪心嘅玩家總會想最好係一款遊戲夠耐玩，又要有遊戲性令佢可以玩落去，而《NieR》就從唔同方面都成功做到。

1. 風格多樣

玩過遊戲，就知道喺遊戲過程當中，例如第一關，2B喺任務入面十足《Macross》咁有得變身戰機玩射擊及閃避（遊戲入面彈幕都十足戰機Game）。另外，遊戲鏡頭亦同現今普遍潮流一樣頗具電影感，跟隨遊戲空間轉變，不過呢個做法就有讚有彈，如果喺戶外地方都可以接受嘅。

轉下戰機咁玩，係得意嘅

2. 故事性算強

《NieR》出名虐心，系列以及本身正傳故事（指《Drag On Dragoon》三部曲）都以多結局聞名，而剛才睇到現今遊戲講求速食又想遊戲有故事性，《NieR》就拎到個平衡。雖然以今集為例，有成26個結局，聽落好似好煩，但正如上面提到只有一至三周目不會重複，咁樣可以同時滿足到系列Fans對故事嘅追求，但同時又為新玩家提供選擇，唔會出現要新玩家夾硬玩晒咁多個結局嚟補完劇情，從而令人卻步。咁Fans就當然就想玩晒咁多個結局啦！
遊戲劇情亦都算有電影感，如果有玩家想玩晒咁多個結局，亦唔會好似沙盒遊戲或者某啲遊戲咁要搞好耐先得（離題講一下，唔知大家有無玩過電腦RPG遊戲《絕代雙驕2》，如果要達成兩大主角追晒所有女，真係煩到HIHI，我都而家都唔知點解當時捱到…）。

3. 音樂水準依舊

一款遊戲要喺玩家心中留下一個地位同印象，畫面未必得（因為科技先進，畫面沒有最靚只有更靚，而呢款遊戲嘅畫面亦唔算特別靚），但BGM相信會有幫助。呢方面就真係唔駛替《NieR》系列擔心，今集嘅原聲帶曾經高踞CD銷量榜亞軍，而且廣受Fans及一般玩家愛戴。BGM嘅突出，令有彈有讚嘅遊戲至少有嘢令大家一致欣賞。

4. 角色造型突出及動作爽快

講完BGM，相信大家提起呢集《NieR》，都會經常提起佢嘅女性角色。無可否認，有位咁正嘅女主角（CB覺得女角尤其2B好正，有好大程度係因為睇到啲Cosplayer腦補角色身材同樣子），如果喺漫長嘅遊戲有靚女相伴，仲可以睇佢用曼妙嘅身姿，用你對手（嘅操控）用上唔同連技去打打殺殺，係好睇嘅。講起又講，就係格鬥動作都值得玩家花多啲時間研究嘅。

有時去到室外轉個鏡頭都幾唔太Friendly，室外還好…

 CB一路玩呢隻《NieR》時，感受到幾深。因為CB一直以嚟都諗緊日系遊戲對現今遊戲嘅影響力，同埋日系遊戲先可以利用本身嘅Identity拎番啲光芒呢？由玩遊戲到睇唔同評論，就知道《NieR》可以利用本身特點嚟贏到玩家嘅心！

文：CB
日本SE遊戲官網連結

遊戲名稱：《Nier: Automata》
對應平台：PS4、Windows（測試版本為PS4）
發行商：Square Enix
發售日：發售中（日版／繁中版）
鳴謝：SIEH提供協助