[遊戲專欄]感作感做：淺談多人遊戲發展觀望－－One More Please？

猶記得CB喺新正頭最中意除咗係利是，就係同親朋戚友打機。除咗人生，仲有Party Game，當然唔少得《Winning》（Winning Eleven），直情試過玩賽車Game玩Time Attack鬥快都有。不過無論係咪新正頭，同人打機呢個Concept，隨住時代演變都逐漸變化，直到《GTA Online》出現，令上網打機再揭新一頁。

比起以前坐喺親友隔離，到而轉做連線就可以，都離唔開對戰元素。至於合作通關，似乎除咗以前坐喺隔離之外，喺現今世代都買少見少。

《GTA Online》推出多時，仍舊保持有內容更新

成大趨勢？

競爭係人嘅本性，合作何嘗唔係？喺《GTA Online》出現前，點解會比較少網上合作通關（至少要長時間需要合作）？大部份都因為劇本問題。正如喺《Uncharted》系列有固定劇本，就算可以合作，都好快過關，而似乎要令玩家可以全心合作過關或完成任務，要長時間合作，《GTA》或沙盒遊戲可以令玩家放多啲時間喺遊戲世界。

而《The Division》，減少沙盒元素，多啲故事性、目的性，同樣獲得成功。不過兩者都有共同點，就係都有類似「刷裝」嘅目的，呢個亦係兩隻遊戲能夠較為持久嘅原因。雖然玩家遊玩時已離開本身故事背景，但佢哋都仍有目標去做，同時PVP（Player Vs Player）始終對玩家有一種吸引力，分別只係我同你隻揪定拉隊同你群揪。

《The Division》成也Dark Zone（暗區），敗也Dark Zone

食髓知味嘅Ubisoft，稍後就推出《Ghost Recon Wildlands》，以接近《The Division》嘅玩法食多浸水。可以預料故事性更多，但PVP會點處理就要睇多啲資料喇；係咪要好似《CS》（Counter Strike）咁Counter-terrorist / Terrorist Wins？

何去何從？

不過，世界無必勝方程式，整Game都一樣，如逆水行舟、不進則退，老本不能食太耐。何況《The Division》開頭係威係勢，去到而家都回落唔少。無可否認呢種「互動」遊戲會愈嚟愈受歡迎，亦會有更多廠商去嘗試，但點先可以唔好抱住「搵快錢」嘅心態出咗就算，而係求個長遠發展？單人模式就係一大重要因素！

人大咗，仲邊有咁多時間同朋友夾時間打機？能夠夾到當然好，但唔少人都好似筆者咁，夾唔到都想單機玩好Game。而且單機好玩，先會更容易令玩家投入去花更多時間「投資」落遊戲中，《GTA V》及《GTA Online》就係一個幾成功嘅例子。而且既然有一個好遊戲劇本，咁做咩要浪費呢？

除咗單機模式，多人模式都有好大進步空間！可能筆者玩得《GTA Online》較少，因此我會覺得其實不斷刷錢又何樂趣之有？及後當然了解到其一樂趣就係「同朋友」玩；至於《The Division》就加入暗區元素。其實無論如何，後來者都要賦予一個多人模式嘅目的，例如「追裝」、「Have Fun」，而可以玩得耐，到時再出DLC咩咩咩都自然多人課金啦！

撇開遊戲好玩與否，《雙截龍4》可以雙打已令不少老機迷收貨

當然，如果多啲次世代遊戲可以推出單機雙打就好喇……

文：CB@unPLUG
unPLUG Page: https://www.facebook.com/unpluggameshk/
Personal Page 我想打機 又要打字: https://www.facebook.com/playgamesandtype/